الجزء الخامس والعشرون

في بريطانيا

طبعا هاليوم كان متعب بالنسبه لعبيد .. من الصبح كان عند العنود واحين لازم يدور السوق ويا سلامه ولطوف عشان يتشرون..

عبيد: سلوووم.. انا تعبان.. دخيلج رحميني .. باجر بوديج

سلامه: لا ما يخصني ابا اليوم يعني اليوم.. ولا ترا بهون عن الدراسه..

عبيد رن تليفونه كان ثاني الي متصل فيه.. : لحظه ثاني خل افهم هالخبله اشوي.. يا حبيبتي.. باجر انزين.. ما قلت لج السنه اليايه

سلامه: احين يوم انا شي في خاطري ما اتسويه لي.. افرض اني مت اليوم وكان خاطري اظهر .. ما بتندم عقب..

عبيد وبعصبيه: جبببببب.. مابا اسمعج اتقولين هالرمسه.. سلامه بس كفايه.. حسوا فيني شيبتوا راسي وانا في عز شبابي.. والله حرام حرااااااااام يا جماعه حراام..

افتشلت سلامه من كلامه ودمعت عينها وتمت تحضنه: انا اسفه .. بس بعد خاطري اظهر..

عبيد: هههه.. لا حووول يعني مصممه..

ثاني طبعا كان يسمع الي يصير والود وده يقوله خلني انا بوديهم..

عبيد: اقول ثاني دخيلك انقذني..

ثاني: خير .. أمرني..

عبيد: تعال اليوم وياي خل انودي هاليهال برع

سلامه: لو سمحت انا مب ياهل..

عبيد: اسف الشيخه.. اوكي شو رايك ثاني؟؟

ثاني: افاعليك.. حاضرين..

عبيد: خلاص الساعه 3 خلك جاهز بنمر عليك..

ثاني: شو رايك اخذ موتر صالح ربيعي.. ونظهر فيه انا ادل الأسواق الي في هالمنطقه

عبد: بس يمكن الريال يعتاز موتره عيب..

ثاني: لا المسكين فيه حمى.. انا قايله من قبل .. قالي اوكي

عبيد: خلاص زين عيل.. اترياك

بند عبيد الخط من ثاني.. وسلامه ميته من القهر الي فيها.. اففف انا هاللإنسان ما ادانيه لازم ايي ويانا.. ما يصير يعني نظهر من غير لا يرز ويهه.. والله ما ادانيييييه.. بس احين ما بقول شي لأني اذا قلت شي عبيد ما بيوديني برع.. بس والله ما اشتهي اجابل ويهه العفن.. افففف

.. ..

في بوظبي.. عند جاسم الملا وعذاري..

عذاري: جاسم اشفيك.. والله حالك مب عايبتني.. متغير وااايد

جاسم: ما بلاني شي..

عذاري: احس بك مهموم..في شي مضايجك..

جاسم: لا حبيبتي مافيني شي.. افكر في المشروع اليديد بس..

عذاري: انت ياما مشاريع سويت ما قعدت هالكثر اتفكر فيها اشمعنى هالمشروع..

جاسم: لأنه هالمشروع اذا نفذته وااايد اشيا سلبيه بتعارضني وانا مابا هالأشيا وفي نفس الوقت مابا اخسر المشروع..

عذاري ما قدرت تفهم شو يقصد.. حست ان في شي كبييير على جاسم مب قادر يتحمله: جاسم .. بو مطر.. حبيبي.. قولي..

جاسم: ماشي لا تحاتين.. انتي بس اهتمي في البيبي

عذاري: البيبي.. باقي جدامه 7 شهور لين ما يطلع للدنيا..

جاسم: شو بنسميها..؟؟

عذاري: يمكن يطلع ولد مو شرط بنت..

جاسم: اذا ولد بنسميه طلال.. عشان خاطر سلامه شو رايج..

عذاري نست سالفه تسميه البنت لأنها تذكرت اختها سلامه: هييييه.. الله يرحمه.. سلامه شو مسويه احين.. والله احاتيها..

جاسم: امسات مرمس عبيد قالي كل شي بخير عندهم وسألته عن سلامه: قالي انها قررت تكمل دراستها واخيرا..

عذاري: والله صدق.. الله يبشرك بالخيييييييير.. وابشرك.. يقول عبيد ناوي انه يعرس.. يبا يخطب وحده..

جاسم: صدق؟؟ .. ههههههه.. والله وكبرت يا عبيد .. واخيرا اقتنع يعرس.. انزين ومنو العروس..

عذاري: انا العنود قالت لي عنها.. بنت زينه وحليلها..

جاسم: منو انزين؟؟

عذاري: عواش.. بنت خال ربيعكم ها فيصل.. الي من فتره ماخذ اختها..

جاسم من سمع اسم عواش انصدم.. : شوووووووووووووووووو؟؟ لا..مستحيل.

عذاري: هههه.. شفيك بسم الله طلعت عيونك من مكانها..

جاسم: ها.. نممممماشي.. بس اقول ليش ما خذ له وحده من بوظبي يعني..

عذاري: بيني وبينك هو شايف البنت وعيبته عشان جيه

جاسم كان ميت من الغيض والقهر.. حاس عمره مب قادر يسوي شي.. لا حرام .. كيف اخسرها .. مابا .. ياربي.. مستحيل عواش تاخذ غيري.. ولا بعد عبيد.. ارجوووك يا ربي مب قادر اتحمل.. لا .. ليش ما شاف غيرها.. ليش عواش بالذات.. ماباه ياخذها.. لالالالالا

عذاري: وين سرحت حبيبي.. (لوت عليه وحطت راسها على ريله).. وين وصلت بأفكارك..

جاسم غير الموضوع بسرعه: افكر .. متى بيي اليوم وبيعرس فيه ولدي مطر..

عذاري: ههههههه.. وين وصلت بأفكارك انت.. مطر وراه سنيييين لين ما يعرس..

جاسم: الله يفرحنا فيه.. تدرين عندي جيس لين احين محتفظ فيه.. قلت بعطيه لسلامه يوم ميلادها..

عذاري: جيس؟؟ اي جيس..

جاسم: سلمج الله طلال قبل وفاته شفته وعطاني هالجيس عشان اعطيه لسلامه..

عذاري: والله.. وحلييييييله .. الله يرحمه.. شو كان فيه..

جاسم: مادري ما اتطالعت بس محتفظ فيها.. وحاطنها في مكتبي.. الجيس مصكوك من فوقه...

عذاري: سلامه عيد ميلادها بعد اسبوعين..

جاسم: ان شاء الله بعطيها...

.. ..

في بريطانيا الساعه 3 .. الوقت الي كان مفروض يطلع فيه عبيد وثاني وسلامه ولطوف..

سلامه: عبيدوووووو .. حبيي انا جاهزه..

عبيد: اوه .. عبيدوو بعد... اول مره اتدلعيني.. شو السالفه

لطيفه: ما عليك منها.ز كل هذا عشان الطلعه.. وعقب بتنسى الدلع..

عبيد: ههههه

سلامه: جب.. جب.. انتي ما يخصج خليني ادلع اخوي على راحته.

عبيد: انزين يلا خل نظهر .. عن نتأخر..

ام عبيد: عبيد انت بعد بتسير وياهم.. بس عادل محد.. منو بيوديني عند العنود..

عبيد: لاحووووول انا كم ريل وكم ايد عندي..

ام عبيد: خلاص خلهم يروحون مع ثاني .. عطهم البيزات.. وخل يروحون.. تراه شرات اخوهم..

سلامه: لا.. مابا

عبيد: شو فيج انتي.. ما بياكلج انزين..

ام عبيد: شوفي تبين تروحين السوق عندج ثاني.. ولا ماشي

لطيفه: يلا عاد سلووم.. شو يعني .. ثاني تراه رابي ويا عبيد.. يعني شرات اخونا..

سلامه حست ان ماشي مفر.. يعني لازم اتوافق.. : اففف.. انزين

عبيد على طول اتصل في ثاني وقال له عن الموضوع وهو في قلبه مستانس ووافق على طول..

عبيد: خلاص هو ياي احين..

سلامه: افففف.. ياريته قال لا..

ام عبيد: ما عليك منها.. يلا نش عبيد خل انروح عندها.. وماعليك من هاي.. انتوا سمعوني لا اتلعوزون الريال.. ولا تتأخرون وايد..

سلامه: انزين...

راح عبيد ويا امه المستشفى وتمت سلامه تتحرطم ولطيفه وياها .. يتريون ثاني يوصل عشان يظهرن وياه..

.. ..

ثاني وصل بعد ربع ساعه.. ولقاهم واقفين عند الباب.. على طول زقرهم عشان يركبون الموتر.. راحت لطوف وياها سلامه صوب الموتر.. سلامه.. طول الوقت كانت مبوزه وتتحرطم..

ثاني: اشفيكم ساكتين .. برقد تراني..

لطوف: ههه.. انا من الصبح ارمس اشفيك.. هاي سلامه جنها حالفه ما ترمس..

سلامه: اقول اكرميني بسكوتج..

ثاني: شوي شوي عالبنت..

سلامه: اختي وانا حره فيها..

ثاني: عاد مب جيه.. خلج حنونه عليها شوي..

سلامه: اختي وانا حره فيها..

لطوف: واذا انا قلت لج مو عايبني اسلوبج وياي..

سلامه: والله مب مشكلتي مشكلتج..

لطوف: انزين خلاص صخي.. سكوتج احسن.. ثاني مره ثانيه لا تطلب منها ترمس..

سلامه: اصلا القعده من غيري مو حلوه..

ثاني: شي اكيد...

سلامه: وانت حضرتك تتمصخر..

ثاني: حرام عليج.. يوم انكلمج بصراحه اتقولين تتمصخر..

سلامه: بس بس وصلنا السوق..

نزلت لطوف.. ونست تفتح الباب علىسلامه لأنه مقفول من داخل.. وثاني فتح لها الباب.. وتم يطالع في عينها وهي ملاحظه هالشي بس مطنشتنه..

سلامه: تعالي يالحماره.. ليش ما فتحتي لي الباب...

لطوف: نسيت..

سلامه: مره ثانيه لا تنسين لو سمحتي...

ثاني:انزين نا فتحت لج الباب...

سلامه:شكرا..

ثاني كان يمشي حذال سلامه ولطوف كانت تمشي اسرع عنهم شوي.. : سلامه.. ممكن اعرف ليش اتعامليني جبه؟؟

سلامه: كيف تباني اعاملك يعني..

ثاني:وايد قاسيه معاي..

سلامه: لاوالله.. يا حراااااااام

ثاني:سلامه ممكن اقول لج شي.. لأني مب قادر اكتم في روحي اكثر من جيه.. احس عمري بنفجر. لازم اقول لج اياه.. انا كنت ناوي اقوله لعبيد اخوج اليوم.. بس ما يا ويانا بقولج اياه انتي..

سلامه خافت.. اتحرته بيقول عن المواقف الي شافها فيهم في بوظبي: شوووو

ثاني: سلامه.. انتي وايد قاسيه علي.. وما تحسين فيه.. يعني انتي ماتحسين بأي شي من صوبي.. بس تجرحيني.. والله حرام عليج.. انا شو ذنبي..

سلامه: ممكن اتقول لأني ابا ادخل المحل واتشرى براحتي..

ثاني: هم اربع حروف..

سلامه: اقول.. بتيلس اتقول لي الغاز.

ثاني: سلامه فهميني مب قادر اقولها مافيني جرأه..

سلامه: اقول بتقول ولا اشلون.ز

ثاني: بقول والي يصير يصير.. وانا اليوم بكلم اخوج عبيد.. بس والله تعبت.. انا احبج يا سلامه

سلامه من سمعت هالكلمه وقفت مكانها ومصدوووومه.. حست ان لسانها انربط ما تعرف شو اتقول.. تمت تتذكر تصرفاته.. تذكر كيف كان يحن عليها يوم خبر وفاة طلال.. نظراته صوبها.. تصرفاته..

ثاني وهو يطلع قطعه من مخباته: واتشوفيه هالقطعه الي لفيتي فيها ريلي.. لين احين محتفظ فيها.. احس بريحتج فيها.. مااتفارقني ابد.. سلامه اسمحي لي على هالكلمه الي قلته.. بس والله غصبن عني.. فهمي شعوري.. انتي في يوم من الأيام حبيتي.. اظني تفهمين شعور الواحد يوم يحب كيف

سلامه: بس بس..

ثاني: ادري.. بتقولين لي طلال المرحوم.. ادري ومقدر.. واحسده على هالحب.. صدقيني بتم اترياج لين ما تحبيني..

سلامه تمت ساكته ومنزله راسها ما تعرف شو اتقول له.. صح انها ما تحبه .. بس في قلبها غير جيه.. يعني ترتاح له.. مب انها اتحبه.. نظراته لها خلتها اتحس بحنيه صوبه.. تمت ساكته ما تعرف شو اترد عليه.. ولطيفه بعيده عنهم مشغوله في المحل..

ثاني: سلامه.. فكري الله يخليج.. لو ما بتحبيني برايج.. بس المهم انج ااتكونين من نصيبي.. بسوي المستحيل عشان اكسب قلبج.. وصدقيني راح اقدر.. وسلامه عشان خاطرج فتحت محل في بوظبي .. محل ورود.. اسمه ازهار طلال.. والله عشانج يا سلامه..

استغربت اكثر واكثر سلامه من تصرفه هذا.. ليش يسوي جيه.. مع اني دومي احقره واكرهه .. لا ياربي.. مابا احب غير طلال.. شو اسوي ياربي... مابا اخون طلال.. ما اقدر..

مشت عنه وراحت تتشرى وذهنها وعقلها مشغول في الكلام الي سمعته.. ما عرفت شو اتسوي.. شو اتقول له.. انها ترتاح له وفي امل.. ولا تحقره.. قررت انها تستشير الدكتور ناصر... لأنه تعرف انه محد بيقنعها للصح غيره..

مر اليوم والكل ساكت.. ولاحد فيهم يرمس غير لطوف.. ولغه الحوار ما بين سلامه وثاني كانت العيون بس.. والصمت كان مخيم عليهم...

وخلصوا شرواتهم وقررت انها تروح المستشغى عند العنود تنام عندها.. وصلها ثاني وخبر عبيد ورد لطوف البيت وهو محتار وحزين مب عارف شو يسوي.. حس بندم ليش رمس وقال لها..

..


سلامه من دخلت المستشفى تمت اتدور على الدكتور ناصر وشافته قاعد في غرفه التلفزيون..

سلامه: دكتور ناصر ممكن اكلمك شوي..

ناصر: افاعليج .. تعالي محد هني..

دخلت سلامه عنده وقعدت شوي قريب منه..

ناصر:خير .. شو الموضوع؟؟

سلامه: ناصر انا ارتحت لك .. واثق في رايك وكلامك.. بغيت اكلمك في شي.. بس بشرط يتم بيني وبينك.. مابا العنود حتى تعرف..

ناصر: خير شغلتي بالي.. خبريني شو الموضوع..

سلامه: ما تقول لحد..

ناصر: افا عليج.. متى اتحيديني قلت لحد شي انتي قلتيه لي.. قولي..

سلامه نزلت راسها ومستحيه ما تعرف شو اترد عليه واتقول له..

ناصر: اشوف عيونج.. (رفع راسها شوي وتم يطالع عيونها .. وشافها غرقانه بالدموع .. وخدودها محمره.. )

ناصر: لا السالفه جايده.. شكلج محتاره في شي..

سلامه: مابا اخونه.. مابا ..

ناصر: ليش اتخونينه؟؟ .. خايفه من شو..

سلامه: ناصر.. ثاني يحبني .. ويباني.. وانا بديت أميل له لأنه وايد يهتم فيني وحنون علي..

ناصر: وين الخيانه قولي لي..

سلامه: ننناصر.. طلال.. كيف احب غيره وهو في حياته ما حب غيري..

ناصر: طلال يوم حبج.. حبج وحب لج الخير.. ويبا يشوف سعادتج.. كيف بتحرمينه من شوفه هالشي فيج..

سلامه: بس..

ناصر: لا بس ولا شي.. ثاني ريال وايد زين.. وانا لاحظت عليه من نظراته انه يميل لج وايد...

سلامه:ادريبه ريال ما ينعاب بشي.. بس طلال المرحوم.. كيف انساه واخونه

ناصر وهو متنرفز: شو فيج انتي.. اخونه واخونه.. قلت لج ما بتخونينه.. ترا من حقج اتكملين مشوار حياتج..

سلامه: تدري .. فاتح محل ورود بإسم طلال بس عشان خاطري..

ناصر: شوفي كيف يحبج.. هالإنسان هو الي بيحي لج ذكراه مثل ما قلت لج..

سلامه: مادري مادري.. محتاره والله

ناصر: سلامه.. ثاني يستاهل.. تبين شوري.. والله ما بتلقين احسن عنه.. ما تقولين لي شو الي بيخليه يودور الإمارات وايي وياكم؟؟

سلامه: مادري..

ناصر: عشانج.. لا تتحرين انه ما يقدر يفارق عبيد وعشان جيه يا وياكم..

تمت سلامه تدمع وساكته..

ناصر: يعني ريال شو كبره عنده اشغال والخ.. يدورهم وايي هني عشان عبيد ..

سلامه: بس..

ناصر: بس انا الي بقول لج بس.. بسج صياح.. مااحب اشوف دموعج

سلامه: ناصر مادري لولاك انا شو بسوي..

ناصر: المهم انتي فكري وخذي راحتج.. وراج ثانويه فكري كيف اتخلصين الثانويه بجداره وعقب فكري في ثاني..

سلامه: ان شاء الله..

ناصر: يلا الوقت تأخر روحي رقدي عند العنود وباجر يصير خير..

..

طلعت من عنده وسارت ترقد في غرفتها..

.. ..

دبي..

فيصل: ها فطيم.. شو يبتي لي؟؟

فطوم: انت قول شو يايب لي.. ساير روما..

فيصل: فايج لج انا .. رايح استانس ويا حرمتي اتقولين لي هدايا..

ريم: ما عليج منه... يايبين لج لبس.. وشويه اغراض بعطيج اياهم.ز

فطوم: مالت على اخوي ولا يذكرني..

فيصل انسدح وحط راسه على ريول ريم.. : وافديت حرمتي.. اقول شو رايج انرد انسافر نفتك من حشره بعض الناس..

فطوم:انا حشره..

فيصل: ههههههه.. لا انتي باعوضه

فطوم: سخيف.. عيل ما بعطيك هديتك..

نش فيصل من مكانه وسار حذال فطوم ويحط راسه على جتفها: افا .. انا اخوج حبيبج.. تزعلين مني..

فطوم: خوز عني.. القمل الي في راسك بيي علي.. وعععععع

فيصل: يلا عاد.. فطوووومه

فطوم: ماشي شريت شنطه حق ريماني.. وانت خذت لك طقم عطور..

فيصل: فديت اختي ما تنساني ادري بها..

...

وتم الكل يسولف.. ومريم اتفكر في ابراهيم معقوله انه يحبني.. ياترى يعرف اني انا بعد احبه.. اااااه يا ابراهيم.. انت ما تدري بحالي.. مشكلتي ساكته ما انطق ولا اقول.. بس ليتك تذكر يوم نحن صغار .. كل ايامي وياك.. كل ذكرياتي.. كل شي مر بطفولتي كان لك دور فيه.. ابراااهيم

.. ..

ومرت الأيام وردت سلامه البلاد ويا اهلها .. وتمت العنود هناك مع امها وجواهر عشان اتكمل علاجها.. كانت حالتها وايد متقدمه لأن العلاج كان مكثف عليها.. تمت اتحاول كثر ما تقدر اتساعد عمرها.. وقدرت تمشي خطواتها بس مع عكاز.. والكل مستانس لهالتقدم.. وناصر طوول الوقت يقعد عندها ويساعدها بكل علاجها.. بدت العنود اتميل له.. واتلاحظ اهتمامه فيها.. وبدت اتحس بالحب.. كان يتعكر مزاجها اذا مر يوم وما شافته..

ونفس الشي ناصر.. جواهر كانت ملاحظه هالحب الي بينهم ومستانسه في قلبها .. بس ما قالت شي.. لين ما تتأكد..

..

في الإمارات كان يوم ميلاد سلامه.. عبيد طبعا ما قصر سوى لها حفله صغيره بينها وبين اخوانها..

وفي هاليوم كان مقرر جاسم يعطيها الجيس الي فيه هديه لسلامه..

جاسم: انا عندي لج هديتين..

سلامه: هديتين!!!.. اشمعنى..

جاسم: وحده فيهم مني.. (سكت شوي ونزل راسه).. الثانيه من المرحوم طلال..

سلامه من سمعت اسم طلال سحبت الجيس الي كان أشر عليه انه منه.. وفتحته وتمت تتطالع الي فيه.. كانت فيه علبه مغلفه بورود صناعيه بس بشكل وااايد حلو.. فتحته وشافت فيه مجموعه عطور.. ودهن عود.. وشافت فيها رساله ..ما طاعت تفتحه احين غير يوم اتكون روحها.. وشافت البوم منسق بشكل رائع .. تمت تتطالع الصور الي فيها واتصيح.. كانت كل الصور لسلامه وياه يوم كانوا صغار.. صور يوم يتضاربون.. وصور يوم يلعبون في الرمل مع بعض.. وصور يوم ميلاد سلامه لما كان عمرها 8 سنين.. وصور واايده حلوه.. تمت اتصيح وقعد عندها عبيد وتم يحضنها.. ويبوس راسها..

سلامه: الله يرحمك يا طلال..

عذاري: ادعي له سلامه ..

سلامه: انا دومي ادعي له.. ودومي اقرا على روحه القرآن..

عذاري: زين اتسوي..

عبيد: فتحي الرساله اقريها..

سلامه: لا اخاف..

عبيد: لازم تقرينها.. فتحيها حبيبتي..

سلامه وهي ترتجف .. فتحت الرساله وشلت الرساله من الظرف وفتحته وهي ترتجف..

سلامه وهي تقرا الرساله: حبيبتي سلامه.. انا ساير عندي دوره.. ومادري في هالدوره شو ممكن يصير.. بس اباج اتعرفين شي واحد مستحيل يصير اني ما احبج وافكر فيج.. بالعكس هالشي ملازمني طول الوقت.. دومج على بالي.. ادري الظروف ضدنا ومب معانا وما تجمعنا.. بس امنيتي اليوم اللي اجتمع فيه وياج.. وابا اقول لج شي.. اذا في يوم من الأيام ما قدرت اخذج.. وفي شي فرقنا.. ما ابج اتصيحين ولا تزعلين.. يكفي اني عارف انج اتحبيني .. وحبج لي مكنون في قلبج لا يمكن انه يزول.. بس الي اباه منج شي واحد.. عيشي حياتج.. حتى لو ويا ريال غيري.. بس وصيه فيج.. قولي له انه يتم وياج.. ويحبج مثل ما احبج.. حبيبتي..

يمكن انتي اتقولين كيف يرضى اني اخذ غيره.. طبعا انا ما برضى اني اكون عايش وتاخذين غيري مستحيل.. انا اقصد اذا فرقني الموت عنج يا سلامه..

هذا الجيس هديه بسيطه مني لج.. لني متعود دوم اهدي لج شي.. بس مادري احس بشي غريب غير عن كل مره مادري ليش.. احبج لا تنسين

طلال.

سلامه ما قدرت تتحمل اكثر من جيه.. ولا قدرت تمسك عمرها من الصياح.. تمت اتصيح من خاطرها.. والكل حولها يهون عليها..

عبيد: شفتي حتى هو يباج اتعيشين حياتج..

سلامه وهي تحضن الرساله: حبيبي يا طلال..

عذاري: سلامه.. انتي احين بديتي دراستج.. يعني ثانويه.. الي نباه منج... واكيد المرحوم يبا منج.. اتبيضين الويه بدرجات تفتح النفس..

سلامه: ان شاء الله..

.. ..

---

 

خلص اليوم والكل راح صوب غرفته الا سلامه الي ما نامت.. تمت طول الليل تتطالع هداياه واتصيح.. وعلى اخر الليل تمت تقرا عليه قرآن كعادتها.. وثاني كان موجود في الحديقه يبا يسمع تلاوتها .. لأنه عارف انها في هالوقت راح تقرا.. تم يطالع صوب بلكونتها.. ويسمع..

حست سلامه بإن في حد مراقبها.. قامت .. وتمت تتطالع تحت.. شافت ثاني واقف.. التقت نظراتهم لوهله وكل واحد يفكر في الثاني..

سلامه: شو اتسوي هني..

ثاني وهو مفتشل: ماشي.. بس قلت اشم هوا..

سلامه: والهوا ما ينشم الا تحت بلكونتي..

ثاني: اسف.. بروح ذاك الصوب.. صح.. كل عام وانتي بخير.. هديتج ما تبينها..

سلامه وهي مب حاسه بعمرها : هيه اباها..

ثاني: خلاص تعالي خذيها.. بحطها عند المطبخ

سلامه ركضت تنزل عشان تاخذ الهديه شافته واقف عند المطبخ: شو فيك واقف..

ثاني: والله انج حلوه..

سلامه استحت من كلامه ونزلت راسها:..

ثاني: متى بتحبيني..

سلامه: وين الهديه.. ؟

ثاني وهو مستانس.. ومبتسم لها: هذي..

سلامه: شكرا

سحبته عنه.. وراحت صوب غرفتها عشان تفتح الهديه.. وشافت ساعه كريستيان ديور وااايد حلوه.. على طول خشت الساعه في الكبت وراحت ترقد.. لأنها حاسه بتعب شديد.. ..



..

اليوم الثاني الصبح..

عبيد: امي.. اباج تخطبين لي وحده؟

ام عبيد: واخييييرا قررت اتعرس.. هاي الساعه المباركه الي اترياها..

جاسم من سمع رمسه عبيد على طول نزل راسه وزاد حزنه.. مب قادر يمنعه او يقول له شي..

ام عبيد: بس منو البنت ما قلت لي.. من بنته.؟؟

عذاري: انا بقولها.. انت اسكت.. سلمج الله امي هاي عواش.. من اهل دبي..

ام عبيد: اي وحده فيهن؟؟

عذاري: ذيج الي حضرت العزا.. بنت خالهم..

ام عبيد: هيييييييييه.. والله خوش بنت.. والنعم فيها وفي اهلها.. انت مقتنع فيها عبيد..

عبيد: هي امي .. شفتها وعيبتني بنت رزينه وحلوه.. ما تنعاب..

ام عبيد: خلاص افا عليك..

عبيد وهو مستااانس: والله صدق.. متى ؟؟

ام عبيد: هونك .. هونك.. شفيك مستعيل؟؟؟

عبيد: اخاف البنت اتطيرمن ايدي..

جاسم وهو مغيض: جيه حمام.. انت احين ودرت بنات بوظبي وتبا وحده من دبي..

عبيد: المهم بنت زينه ما يهمني من وين.. البنيه ما تنعاب بشي

عذاري: صدقه عبيد.. انا وايد احبها الصراحه.. حبوبه ماشاء الله عليها..

عبيد: امي.. اليوم رمسيهم وخذي منهم موعد..

بو عبيد: هههههه.. مستعيل دومك..

عبيد: ولا ترا بهون..

جاسم وبصوت واطي: يارييت

عذاري: شو حبيبي..

جاسم: اقول.. الله يهنيك..

عبيد: ويهني الجميع..

ام عبيد: اتريا اشوي.. مب اليوم..

عبيد: واذا قلت لج احين.. مالي شغل..

جاسم: اشفيك مستعيل.

عبيد: ما يخصني.. اليوم يعني اليوم..

قامت عذاري ويابت التليفون عن يحتشر عليهم عبيد زود عن جيه.. : هاج امي اتصلي..

ام عبيد: عيب .. على ويه الصبح.. خل العصر بدق

عبيد: شو الصبح... احين الساعه 11 الكل واعي.. يلا امي عاد....

ام عبيد: ههههه.. هاتي..

اتصلت على رقم عواش وطلبت منها امها.. عواش تمت اتحاتي ما عرفت شو الموضوع... عذاري متصله.. شو السالفه...

جاسم قاعد على نار.. مب عارف شو يسوي .. قرر انه يطلع لأنه مب قادر يتحمل زود...

ام ريم: هاي الساعه المباركه.. يا حياج انتي وابو عبيد في اي وقت

ام عبيد: الله يحييج.. خلاص الخميس ان شاء الله نتشاوف

ام ريم: على خير.. ان شاء الله

بندت الخط وبشرت عبيد الي طار من الفرحه.. واما عواش يوم سمعت الخبر انصدمت.. كيف بترفضه.. كيف بتمانع.. لا ياربي.. كيف اخذ عبيد.. وجاسم وياهم في البيت.. لا ياربي.. ما اقدر اوافق..
الفصل الثاني من الجـ 25 ـزء



عبيد كان طاير من الفرحه ومب عارف شو المفاجأة الي تنتظره.. واما جاسم فكان عايش في عالم من الحزن.. كيف يرضى ان عواش تاخذ غيره.. ولا مب اي انسان بعد.. عبيد..

آه يا زمن يا مفرق الأحباب..

آه يا زمن يالي تعيشني مع حبيبي كننا أغراب..

احبه وكل يوم احلم بطيفه..

يجيني ويسليني...

مابي افقده يا ناس..

هذا حبيبي وابيه يصير من نصيبي..

كيف ارضى بعاذل يفرقك مني..

مالي حيله مع الأقدار..

وماني قادر اتحمل الي صار..

آه يا زمن يا مفرق الأحباب..

تم يحاتي .. ياربي كيف راح اترد عليهم عواش.. بتوافق عليه.. وبترضى فيه.. وانا .. كيف .. وين رحت؟؟ وين مكاني من حياتها.ز آآآآه والله مب قادر..

..

في دبي .. في بيت بو الريم..

ريم كانت يايه عند امها اتزورهم.. وعرفت السالفه من عواش.. وفيصل يوم عرف استانس لأنه يعرف عبيد ريال ما ينعاب..

ريم: عواش.. انتي شو رايج؟؟

عواش: مادري ياريم.. مادري..

ريم: لا تنسين ان الراي الأول والأخير لج انتي..

دخل عليهم بو الريم وشاف عواش قاعده..

بو الريم: السلام عليكم... اشحالكم بناتي؟؟

ريم+عواش: بخير ابوي..

بو الريم: شوفيها عواش قاعده فوق .. ؟؟ شو فيها بنتي..

عواش: ماشي ابويه..

راشد: شوفي عواش.. انا تدرين منى عيني اشوفج معرسه واشوف عيالج.. مثل ما تمنيت هالشي لريم .. وصار.. اباه لج.. وعبيد ريال والنعم فيه.. سألت عنه والكل يمدح فيه.. ريال يشتغل.. ومتعلم ماشاء الله عليه.. يعني ما عليه قصور.. في نظري مااشوف فيه شي يخليج ترفضينه.. وغير جيه ماشاء الله عليه.. مملوح.. يعني حلو...

عواش: بس ابوي.. انا بعدني ادرس..

بوالريم(راشد): شو المانع ياما بنات عرسن وهن يدرسن.. يعني مب شي يديد.. وانتي قدها ابوي..

ريم تمت تتطالع في عواش الي كانت مب قادره اتقول لا واترد ابوها..

عواش نزلت راسها والدمعه على خدها: الي اتشوفه ابوي..

راشد: وانا هذا الي احيده منج.. بالبركه

وظهر ابوهم من الغرفه وتمت عواش اتصيح.. وريم اتهون عليها..

ريم: يوم ما تبينه ليش ما قلتي..

عواش: شو ارد عليه.. ما عندي سبب مقنع..

ريم: بس انتي كيف بتتحملين هالوضع انج اتكونين ويا عبيد.. واتشوفين جاسم تقريبا كل يوم..

عواش: مادري يا ريم مادري.. الله يعين

ريم: على قولتج الله يعين.. بس عندج فرصه ردي فكري..

عواش: بس انا رديت على ابوي ومب راده بكلامي وياه..

ريم: الله يهنيج..

عواش: تسلمين..

.. ..

من عرفت فطوم بالسالفه الا وطارت من الوناسه...

فطوم: الللللللله كشخه.. بعد عرس في العايله.. ولا بعد مب اي عرس.. عرس عواشي..

ريم: شفتي عاد كبرت وبتصير عروس.. عقبالج..

فطوم: آميييييين الله يسمع منج..

فيصل: بل بل بل.. لا على ذيج الأيام الي حاشرتنا فيها ما تبين طاري غانم ولا على احين مستعيله علىالزواج..

فطوم: فديت غنوومي انا..

فيصل: وينك يا غانم تعال اسمع.

خوله: انزين ريم ما سألتي عن حاله العنود شو اخبارها؟؟

فيصل من سمع عنود كأنه حد صب عليه ماي بارد.. تم مبهت .. وسرحان.. ويتريا الرد من ريم عن حالتها.. لأنه بذاته متلوم..

ريم: مادري والله انا ما كلمتهم من زمااان

مريم: لا انا اتصلت من فتره لعذاري وقالت لي انها بخير.. وماشيه زين في العلاج.. وصارت تقدر تمشي شوي شوي..

فيصل من سمع هالخبر استانس في قلبه.. وتم يحمد ربه ويشكره

خوله: زين يحليلها ما تستاهل..

خالد: الا صدق الي سمعته يعني.. عبيد الي خاطب عواش..

فيصل: هيه.

خالد: والله من عقب اعراسنا بالدور قاموا البنات يعرسون.. صدق يوم يقولون ان الحريم ينخطبون من عقب الأعراس.. كل وحده اتشوف لها مزيونه وتتنقاها لولدها.. ها شغل الحريم معرووووف..

مريم: ليش بعد منو بيعرس؟؟ لا يكون نواري.. ؟

خالد ويهو يطالع مريم بنظرات خبيثه: ليش ما تكونين انتي؟؟

استحت مريم من رمسته ونزلت راسها وتمت اتأ تأ في الرمسه: لا شو انا..

خالد: واذا قلت لج هيه..

خوله: صدق.. ومنو سعيد الحظ..

خالد: ناااس..

فيصل: منو هالناس يا خالد..

خالد: اسأل مريم اتعرفهم..

مريم: حشى علي ما اعرف شي.. شو تقول انت عن شو ترمس؟؟

خالد: عن المعرس..

فطوم: ومنو هذا عريس الغفله الي ياينا...

خالد: ابراهيم.. ولد جيرانكم خوله ..

خوله: اخو عواطف.. والله.. زييييين ريال واايد زين

مريم يوم سمعت اسم ابراهيم انصدمت تمت تتطالع خالد الي كان بدوره يطالعها ويبتسم.. لنه يعرف عن علاقه الطفوله الي كانت تربطهم.. وكان يحس ان في شي يربط بينهم.. الكل تفاجأ واكثر وحده طبعا مريم.. كيف ومتى وشلون؟؟

فيصل: الصراحه.. والنعم.. ابراهيم زين الرياييل

خالد: وانا هذا رايي فيه..

خوله: بس متى كلمك ؟؟

خالد: امس كنت في بيتهم.. فتح السالفه وياي.. وانا قلت له اتريا اشاور البنت..

فيصل: ها مريوم شو رايج..

مريم ما قدرت تتحمل اكثر.. كان الخجل مسيطر على تصرفاتها وماكل خدودها.. قامت وظهرت من بيت خالد وفيصل وراحت بيتهم ولحقتها فطوم..

فطوم: مريوووم.. اتريي..

مريم: شو,.

فطوم وبخبث: هاااااااا.. شو رايج.. تصرفج يقول موافقه..

مريم وهي اتفر فطوم بشيلتها.. : جب جب..

فطوم: هههههههه والله اول مره اشوفج جيه محمره من الخجل..

مريم: لا والله شو قالو لج.. عيني قويه شرواج..

فطوم: حرااااام عليج.. انا امووت من المستحى اذا قالو شي عن غانم..

مريم: لا بااااين.. واااايد اتصدقين..

مريم قامت ودخلت البيت وتوها فطوم بترد بيت خالد الا اتحس بكوره صغيره تضرب في راسها:اااااي.. مريووووووم

يوم صدت شافت مريوم محد.. شافت غانم واقف ويضحك عليها..

فطوم: انا اراويك.. (ردت شلت الكوره وفرته عليه)... يالحمااااار..

ما يت الكوره عليه قدر يمسكها: وييييييو .. ما تعرفين اتفرين كور..

فطوم: ماعليه وين بتشرد عني..

غانم وبجديه وخوف: لا تتحركين نصيحه..

فطوم وهي مصدومه وخايفه: ها.. ليش شو؟

غانم: فااااااااار تحتج.. هههههههههههههههه

فطوم ماتت خوف غطت بإيديها على ويهها وتمت اتصارخ.. الكل من سمع صريخها طلع وشافو غانم ميت من الضحك وهي في هالحاله..

فيصل: شو السالفه..

غانم: هههههههه... اختك الهبله قصيت عليها اونه فار تحتها.. ومن وقتها وهي ميته خوف ما تتحرك..

فطوم من عرفت انه قاص عليها عصبت وغيضت.. : ما احبك انزين.. وياويلك لو كلمتني مره ثانيه.. ما اااااااااااااحبببببك... ماااااااااااااااااااااااااااا احبك..

وركضت وهي مغيضه ودخلت البيت.. غانم استغرب ما توقع انها اتعصب لهالدرجه.. بس هي لأنها حست بإحراج عشان جيه..

خوله: غنووم.. حرام عليك.. احرجتها جدامنا..

غانم: هههههه.. مب قصدي والله.. بس ما توقعت اتخاف لهالدرجه..

فيصل: هاي تخاف من ابسط شي..

خالد: عاد يالنسيب.. هالله هالله بإختي.. هاي دلوعتنا..

غانم: ههههه.. ماعليكم انتوا.. خل اخذها بس.. شوفوا شو بسوي.. بشيب راسها..

ريم: حرااااااااام

غانم: شو حرام.. لو اتشوفين.. شو سويت فيها في ماليزيا.. ههههه.. والله ضحك.. شيبت راسها..

فيصل: مب هين بعد..

خالد: انزين شو يايبك هالوقت غريبه .. الأهل صاير فيهم شي..

غانم: لا بسم الله عليهم.. ماشي بس ناس مطرشيني اتخبر عنكم شو الأوضاع..

فيصل: شو سالفه هالناس الي قاموا يطلعون.. شو السالفه

خوله: لا تقول ابراهيم يبا يعرف راي مريوم..

غانم: والله ذكيه اختي.. اقول خالد.. اهنيك على هالحرمه الصراحه..

كانت فطوم تتطالعه من فوق البلكونه وميييته ضحك حتى قبل لا تنتقم منه.. جهزت كل شي عشان تبدا انتقامها.. (شوفو شو سوت.. ذكيه),,

ريم: الظاهر هو عاشق ولهااان..

فيصل: شراتنا يعني..

فجأه الكل سمع صوت استغربوا..

اليده: غنوووووم.. ويهد ان شاء الله.. ليش اتلعوز دلوعتي.. انت ما يمشي عليك غير هالعصا..

غانم من سمع صوت يدته فز ونقز ورا خوله اخته.. والكل ناقع عليه من الضحك.. وفطوم ارتفع صوت ضحكها زوود..

غانم: بسم الله الرحمن الرحيم.. صدق الي سمعته ولا يتهيأ لي..

فيصل: لا شو سمعت.. نحن ما سمعنا شي.. (ههههه وهو ميت من الضحك ماسك عمره عشان يخبل فيه زود.. وغمز للكل عشان يسوون نفس الشي)..

خوله: اشفيك الي يشوفك يقول شايف يني..

خالد: المسكين متعقد من عصاة يدوو.. من كثر ما انضرب منها قام يحس انها 24 ساعه وياه..

غانم: هي والله.. بس صدق ما سمعتوا.. انا متأكد اني سمعتها.. والله متأكد..

ريم: لا ما سمعنا شي.. انت خرعتنا بحركاتك..

اليده: غنوووووووم.. والله ان وطيت خطوه في البيت بس شوف شبسوي فيك.. بمرغك بالعصا..

غانم: خولوووووووو .. هالمره اكيد سمعتوا..

خوله وهي ميته ضحك: لا شو.. ما سمعت شي..

خالد: ولا انا..

غانم: لا حوووووول..ز خوله انا بنام عندكم اليوم تكفين.. يدو متحلفه فيني..

خوله: وحليلها يدو.. لا تظلمها.. اشفيك انت.. يتهيأ لك.. وبعدين اسفه ماشي مكان في بيتي

غانم: فيصل..

فيصل: اسف لا تتطالعني ماشي..

غانم: ماشي غير فطوم.. حبيبتي.. بتنقذني...

فطوم من فوق: ماشي.. ولا تحلم.. انا قايله لك ما اكلمك.ز

غانم: بسم الله من وين طلعتي انتي.. والله انا اليوم بتخبل.. شو ناوين علي انتوا.. بس ابا افهم شي واحد صدق ما سمعتوا صوت يدوو..

الكل: لا..

غانم: والله بتخبل.. اعوذ بالله من كل شيطان رجيم.. لا إله إلا الله.. محمد رسول الله..

فطوم: هي زين .. اتشهد على عمرك.. عن تجتلك يدوو وانت بعدك مب متشهد..

غانم: حبيبه قلبي فطوم.. انا اسف اسولف وياج..

فطوم وهي منزله ايدها من على البلكونه: بوسها..

غانم: والله بييب دري وببوسها.ز

فيصل: شو اتبوسها .. تخبلت..

خالد: يبانا انقص راسه؟..

غانم: دخيلك فيصل.. انت وايد اتحبك فطم بتسمع كلامك.. قولها خل اتسامحني.. ولا تراني اليوم بنام في الشارع.. او بروح مستشفى الأمل .. بننتوني.. (مستشفى الأمل مستشفى امراض نفسيه)..

الكل ميت من الضحك.. وفطوم اكثر وحده.. جان اترد اتسمعه صوت يدته.. وهني الكل ما قدر يزخ عمره من الضحك يوم شافو غانم كيف متخبل وزايغ..

فيصل: والله انت محد يعرف لك غير فطوم ويدوو..

غانم يوم استوعب السالفه.. وعرف ان فطوم مسجله صوت يدتها من علىالتليفون عشان اتزيغه تم يتحلف انه ينتقم منها..

فطوم: وحده بوحده..

غانم: وين بتشردين عني.. اليوم ولا باجر اذاما رمت اجكج.. تراج بتين بين ايديي يوم بنعرس.. والله اراويج..

.. ..

---

الفصل الثالث من الجزء 25.



يوم الخميس..

الكل كان مشغول.. طبعا عبيد وهله كانوا في الفندق في دبي.. وطالبين بوفيه من مطعم صدف.. مع خدمات فندقيه لبيت راشد (بو الريم).. الكل مستانس ومندمج.. الا اثنين .. عواش وجاسم.. كل واحد حاس بطعنات في قلبه ومب قادر يسوي شي..

عواش كانت في الصالون تتزهب.. كانت ايه من الجمال.. والكل وياها مستانس وهي ما تبين حزنها لأحد.. غير ريم لنها عارفه بالموضوع.. وكان مقرر ان كل شي يكون جاهز على الساعه 8.00 يتواجدون في بيت راشد.. عشان يكلمون مراسم الخطوبه.. ويلبسها الدبله..

عواش: ريم... خيفانه..

ريم: انتي هدي عمرج.. عشان محد يحس..

عواش: هو بيكون موجود اكيد.. كيف بتحمل..

ريم: ماعليج.. الله كريم.. انتي لا تهتمين فيه.. فكري في عذاري المسكينه.. شوفي كيف مستانسه لأنج بتصيرين لأخوها..

عواش: هي والله.. ما تستاهل الي سواه فيها جاسم..

ريم: خلاص عيل..انتي هدي.. وهاي فطوم يايه صوبنا..

فطوم: يلا.. خالد يتريانا برع..

ريم: يلا نشي عواش..

عواش: شكلي طالع اوكي..

فطوم: القمر لو يشوفج بيغار..

مريم: شو تتريون.. فرش احمر.. يلا بسرعه متأخرين الساعه احين 7.30 يعني يادوب نوصل وانلبسها عشان التصوير.. والضيوف بيون

عواش: يلا.. هاتو عباتي..

الحريم ظهروا وركبوا الموتر عشان يروحون البيت..

يوم وصلوا البيت كان الكل مرتبش في الحوش يجهز الطاولات.. كانوا مسوين قسمين.. قسم للحريم وقسم للرياييل.. بينهم حاجز.. غير صوب البوفيه كان مشترك ما بين الحريم والرياييل ما قدروا يفصلونه عن بعض..

طبعا اول ما وصلوا دخلوها الغرفه بسرعه لأن المصوره كانت تنتظر عواش عشان اتصورها كم صوره بروحها وعقب اتصور لحظات الخطوبه..

لبسوها اللبس والذهب كانت طالعه في قمه الجمال.. ملامح عربيه حلوه.. الخشم كأنه سيف مسلول.. والعين.. عيون عربيه وسيعه السواد فيها.. والشعر حرير متدلدل على ظهرها.. ويوم لبست الذهب البحريني.. مع هاللبس وحطت الشيله بالطريقه العربيه على راسها كانت ايه من الجمال.. الكل تم يسبح ويقرا عليها.. الكل نزل عشان يتعشى وهي تتصور على راحتها..

مريم: انا الصراحه ميته يوووع..

فطوم: حتى انا من الصبح ما كلت.. اويه نواري حبيبي هني.. بروح ازقرها عشان اتيي ويانا

مريم: يلا بسرعه انا سايره..

راحت مريم صوب البوفيه وشلت الصحن وتمت اترس لعمرها.. وانتبهت ان في ريال ياي صوب البوفيه تحجبت عدل.. ياها فضول تتطالع من هالريال.. يوم رفعت راسها.. انصدم منها.. وهي بعد انصدمت حست بفشله تذكرت الموقف ..كان ودها تضحك بس من الفشيله صخت.. واحمرت خدودها.. عبيد من شافها يود عمره من الصدمه.. كيف جيه.. هاي عواش يعني.. بس شو الي بييبها هني صوب البوفيه.. ما احيد العرايس ايون يتعشون ويا المعازيم.. لا.لا لا.. يارب الي افكر فيه مب صح.. معقوووله.. انا اكون مغلط فيهم.. لا مستحيل..

يت فطوم صوب البوفيه وشافت مريوم اتحط لعمرها وتمت تزقرها: مريووووم..شو حطيتي حق عمرج خل احط شراتج..

مريم: صخي الله يغربل ابليسج ريال هني..

فطوم: اوه سوري..

عبيد يوم سمع اسمها حس ان راسه مفتر... مب قادر يجمع الي يسمعه مع الي فاعد يصير.. لا .. مستحيل.. انا مغلط.. كيف جيه؟؟ حراااااام.. ااااه والله مب قادر اوقف على حيلي.. كيف جيه.. مريم.. وانا اخطب غيرها.. كيف غلطت هالغلطه.. لا حرام.. عبيد ما كان قادر يتحمل الصدمه اغمى عليه وطاح انكسر الصحن الي كان ماسكه.. فطوم من شافته شهقت.. وتمت اتصيح خافت.. وراحت مريم اتنادي على فيصل..

فيصل: خلاص هدوا.. لا تخلون حد يدري.. ترا هالمعرس مب زين عليه..

ام عبيد يوم عرفت ارتبكت تمت اتحاتي.. دخلوا عبيد غرفه ريم.. طبعا مريم لأنها دكتوره عارفه كيف تتصرف.. سوت كل شي وكانت واقفه على راسهقاعده اتحاول اتقومه.. يوم فتح عينه وشاف مريم واقفه على راسه.. :لا مستحيل.. كيف جيه..

ام عبيد: يما عبيد.. بسم الله عليك شفيك..

عبيد حس بإحراج يوم شاف فيصل .. حس عمره مب قادر يسوي شي.. كيف ينسحب ويقول انا ابا هاي.. مب عواش.. انا مغلط.. قام من مكانه وراح عند فيصل..

عبيد: لا تحاتي مافيني شي.. بس لأني من الصبح مب ماكل شي.. ومن الربشه كم يوم مب راقد عدل..

فيصل: لاما عليك.. ما تشوف شر... كلنا مرينا بهالموقف..

عبيد: مشكوره اختي ما قصرتي..

مريم: افا عليك.. ما تشوف شر ان شاء الله.. روح اشرب لك عصير وبيعتدل حالك..

عبيد: ان شاء الله.. مشكوره..

طلع عبيد الي كان مهمووم.. اختربت كل فرحته.. كل امل كان راسمه انسمح.. كيف؟؟ ليش؟؟ ااااااه يا قلبي مب قادر اتحمل.. ااااااه يا زمن والله مب قادر اتحمل آهاتك.. آآآه يا زمن متى بتخف علي بزلاتك.. والله اني مب قادر اتحمل كل لحظاتك.. ابا ارتاح.. ابا اتنفس .. عونك ياربي من هالزمن .. القاسي علي.. ارحمني يا زمن من زلاتك

رد عبيد صوب الرياييل وما بين لهم الي صار احتراما لفيصل وخالد.. والكل.. وخاصه ابوه ما يبا يبين انه مغلط عشان ما يفشله .. ويطيح من عينه.. والناس يعتبرون ان ماله كلمه.. قرر انه يمرر الليله على خير.. ويتحمل مصيبته.. عل الله يساعده عليها..

..

ومرت الساعات كأنها دقايق على عبيد وقرروا يدخلونه عند عواش عشان يلبسها الدبله.. كان يمشي ويحس خطواته اتثجل عليه.. اما جاسم فراح وقعد في الموتر وتم يطلع الي في خاطره من صياح.. ويصيح على الي صار.. مب قادر انه يقتنع من الي صار ويصير.. كيف جيه.. عواش مب لي خلاص.. يعني انا فقدتها.. في لحظه بتصير لغيري.. لالا مب قادر اتحمل ..

عواش الربكه والخوف كان باين عليها.. كل ما تسمع اليباب يزداد خوفها.. وتمت تذكر جاسم.. اااه ياقلبي.. كنت اتمناك بداله.. ليش ياربي ليش..

احبه هالإنسام والله احبه.. كيف.. ؟؟ هاليوم كان مفروض انت اتكون بداله مب عبيد.. بس شو اقول غير الله المستعان.. وليش افكر فيه.. خلاص انا بصير في ذمه غيره.. وعبيد من الصوب الثاني اول ما دخل الصاله الي فيها عواش الي كانوا مغطين ويهها .. تمت عيونه تدور على مريم.. وشافها واتنهد.. انتي الي كان لازم اتكونين هناك.. كيف غلطت هالغلطه وفقدتج.. لا .. مب قادر.. مستحيل الي قاعد يصير.ز انا في حلم انا متأكد

جرب وقف عند عواش.. وطلعوا باقي الرياييل... وشلوا الغطا من على ويه عواش عشان يشوفها.. من شافها انبهر من جمالها واعجب فيه.. بس مع ذلك ما قدر يمحي مريم من باله.. بعدها الي مالكه قلبه.. احبج يا مريم..

كان الكل مستانس وعبيد يصطنع البسمه على شفاته وعواش نفس الشي.. وكل واحد فيهم مب عارف ان الثاني يفكر في غيره ويباه غيره..

كانت اللحظات تمر على عبيد كأنها سنين.. ويعد الساعات متى يطلع من هالمكان ويرد البيت .. يبا يقعد بروحه شوي.. ويعاتب نفسه على هالغلطه..

ولبسوا بعض الدبل.. يعني الإرتباط صار رسمي لا محال.. عواش كل ما كانت تشوف عذاري تذكر جاسم.. وتشوف البسمه والفرحه على شفاتها اتعاهد نفسها اكثر انها تنساه..

وعبيد كل ما كانت نظراته تلتقي مع مريم.. يزداد حسافه..وألم..



وانتهت الليله على خير.. وعواش عطته رقمها.. عشان يتصل فيها ويكون بينهم اتصال..

ماقدر ينكر جمال عواش الي جذبه.. ومب قادر يجذب على نفسه انه ما يحب مريم.. بس هذا الي صار ولازم يتحمله ويصبر عليه.. لا مفر..
تابع/الفصل الثالث من الجــ25ـزء



عواش وريم قاعدين روحهم من بعد ما راح الكل..

عواش: ماا اقدر والله ما اقدر.. كل شي يذكرني فيه..

ريم: اتحملي.. خلاص انتي انخطبتي له احين رسمي..

عواش: كيف ؟؟ مرته.. ولده.. حتى هو .. كل شي يذكرني فيه..

ريم: ما شفتي الفرحه الي كانوا فيها لأنج صرتي خطيبه ولدهم..

نفس الوقت وصل مسج لعواش ركضت اتشوف المسج.. شافته من عبيد .. يخبرها ان ها رقمه.. عشان ترد عليه اذا اتصل ولا شي..

ورد طرش لها مسج ثاني..

وحشتوني..



كثر حلاكم..



وكثر غلاكم..



وكثر حبي للجلسه معاكم..

عواش: والله مب قادره اتحمل خلاص.. ريم.. دخيلج زخيني.. احس عمري بطيح عالأرض..

مسكتها ريم وفعلا بغت اتدوخ.. ودتها صوب السرير عشان ترتاح شوي.. وطلعت عنها لأنه فيصل كان يترياها.. طلعت ويهها كان متغير.. مهمومه اتفكر بحال عواش.. ما ودها اتخليها بروحها وما تروم تقعد عن حد يحس ان في شي..

فيصل: ريم فيج شي.. انا متأكد..

ريم:لا مافي شي حبيبي..

فيصل: ريم لا تخشين عني.. عبيد .. عواش .. و لاانتي.. شو السالفه..

ريم :والله مب قادره اكتم في روحي لازم اخبرك.. بس لا تفهمنا غلط

فيصل: قولي..

ريم: عواش ما تحب عبيد.. خذته عشان ما ترد كلمه ابوي.. بس هي تحب شخص ثاني

فيصل: افاااا.. وليش ما تقول..

ريم: المشكله انها حتى لو قالت ما تقدر انها ترتبط فيه

فيصل: ممكن اعرف منو هو.. ولا ما يحتاي..

ريم: بس يتم بيني وبينك..

فيصل: افا عليج حبيبي.. قولي.

ريم: كانت اترمس جاسم نسيبهم في التليفون من سنين.. جريب 4 سنين من عمرها.. بس تركته .. لأنها عرفت انه معرس يوم العزيمه .. يوم ما تعرفنا عليهم.. وهي متحسره.. وفي نفس الوقت صعب عليها اتجابله في نفس البيت

فيصل: الخسيس.. يرمسها وهو معرس.. ليش جيه..

ريم: مادري.. بس بغاها.. تم يحاول يرجع لها بس هي صدته

فيصل: الله يعينها .. والله حاس بمعاناتها..

ريم: هي والله.. خايفه عليها..

فيصل: جان تميتي عندها..

ريم: مابا حد يشك في شي.. عشان جيه

فيصل: الله يهنيها ان شاء الله عبيد يعوض عليها..

ريم: امين..

..

فيصل تم سرحان ويفكر طول الدرب,.. اه من الحب.. كم يعذب القلوب.. انا .. وعواش.. ومريم.. كلنا تايهين في دائره الحب الي انأسرنا فيها فتره وما طلعنا منها الا بعد عذاب.. مب بس لعمرنا.. عذاب شمل.. حتى احبابنا والي حولنا.. الله يكون في عونج يا عايشه .. ومريم..

ريم: اقول.. شو صار على سالفه مريوم..

فيصل: ااه ياريم.. مريوم سالفتها سالفه بعد.. الله يعينها والله

ريم: خير شو صاير..

فيصل: اتخيلي عرفنا السبب الي خلا ابوي يرفضه.. والله حرام عليه..

ريم: شو السالفه؟..

فيصل: عشان غلطه ارتكبها ابو ابراهيم في اللاوعي بعد.. احين لازم يدفع ثمنها ابراهيم.. ونسى ان مريم بعد لازم تاكلها.. ماعرف كيف افتح الموضوع لمريم ولا لإبراهيم.. والله راسي افتر..

ريم: الله يكون في عونك حبيبي.. شكلك وايد تعبان

فيصل: الا قولي هلكان.. والله ماعرف شو اسوي.. انا وخالد راسنا مفروور فر.. مانعرف من وين ولا وين انييبها.. الله المستعان

ريم: الله يهديك يا عمي.. حرام يفرق قلوب عشان سالفه جديمه

فيصل: شفتي كيف.. بس منو يقدر يقنع ابوي احين..

ريم: ماشي غير يدوو تقدر عليه...

فيصل: لا دخيلج.. السالفه يدو روحها ما تعرف عنها.. ولا عمي خليفه .. لو دروا بالخلاف القديم هذا راح يجدد وايد اشيا... ويزداد العناد

ريم: والله حاله.. انييبها من وين ولا وين..

..

فطوم طبعا كانت مستانسه وفي نفس الوقت اتحاتي مريم.. ما تعرف شو اتسوي.. فقررت اتروح عند ابوها واتشوف شو رده..

دقت عليه الباب في المكتب.. بوخالد: منوو؟؟

فطوم: انا ابويه.. ادخل..

بوخالد: تعالي دلوعتي الغاليه تعالي..

دخلت فطوم عند ابوها وشافته مشغول بهالأوراق اترددت تكلمه بس صممت انها تفتح السالفه.. فطوم: ابويه.. بغيت ارمسك في حايه..

بوخالد: خير.. قولي لي.. امريني؟.

فطوم: ماعاش من يأمر عليك.. بس لا تحرج علي اوكي..

بوخالد: ان شاء الله.. رمسي قولي الي في خاطرج..

فطوم: ابويه.. موضوع مريم وابراهيم.. لين متى بتم جيه يعني رافض.. حرام والله رابين ويا بعض.. وبــ

قاطعها ابوها بصوت عالي: انا قلت رايي.. وخلاص.. لا يعني لا.. ومابا حد يناقشني.. قولي حق اختج هاي.. خل تتأدب ولا انا براويها شغلها.. ماشي.. خل تنسى شي اسمه ابراهيم..

فطوم والدموع في عينها: ابويه انت وايد قاسي.. عمري ما تخيلتك بهالقسوه علينا.. نحن عيالك ما قمنا نهمك.. تجرح فينا.. الله واعلم يوم بكبر انا شو بتسوي فيني..

وطلعت من المكتب وهي اتصيح.. شافها غانم وهي اتصيح.. لأنه كان مقرر يبات عندهم..

غانم: فطوم.. حبيبي.. شو فيج..

فطوم ما عبرت غانم ودخلت غرفتها وصكت الباب على عمرها وتمت اتصيح من خاطرها..

غانم حس ان ابوها قال لها شي ضايج فيها.. عشان جيه اتصيح.. دخل عند عمه الي كان قاعد ومهموم.. عمره ما حب يزعل فطوم بالذات.. واايد يحبها ودوم يدلعها لأنها الصغيره

غانم: عمي.. كافي والله يكفيك الي اتسويه في مريم.. وهالدور في فطوم..

بوخالد: لا والله.. انت بتعلمني على عيالي..

غانم: محشوم عمي.. نحن نتعلم منك ما نعلمك.. بس حرام والله..

بوخالد: انا ما كان ودي ازعلها انا قلت لها رايي عن زواج مريم .. وهي تمت اتصيح واتقول كلام ماله معنى..

غانم: عمي انت زرعت الخوف بقلبها من قرارك عن زواج مريم.. وهي مستحيل اتشل هالخوف من قلبها لو شو ما يصير..

بوخالد: انا.. ليش؟؟

غانم: هي كله خايفه.. اتقول ابراهيم ريال ما بلاه شي ابوي رفضه والسبب مجهول.. اكيد بيسويها فيني انا .. يعني قصدها يوم انا بخطبها رسمي..

بوخالد: لا شو هالكلام.. مستحيل.. انت ولد اخوي وين بلقى احسن عنك..

غانم: شو الي بيشل هالخوف من قلبها احين.. ؟؟!!!

بوخالد: حبيبتي يا بنتي.. ازقرها خل اكلمها..

غانم استانس.. وطلع من المكتب وراح صوب غرفتها يزقرها بس محد يرد عليه.. خاف.. تم يدق الباب بقو.. طلعت مريم وبوخالد .. تموا يتطالعون غانم الي يحاول يدق الباب ومحد يرد عليه.. كلهم خافوا عليها.. وتموا يفكرون.. ويحاتون..

مريم: اختي حبيبتي.. فطووم.. ردي علي انا مريوم

بوخالد: وانا ابوج بنتي ردي علي..

طلعت ام خالد من غرفتها عشان تشوف شو السالفه من الصوت الي تسمعه.. مريم ماتت زياغ.. كانت اتدق على تليفون فيصل.. رد عليها..

مريم: فيصل تعال.. فطوم في الغرفه قاعدين اندق عليها الباب وما ترد علينا..

فيصل: شووو.. فطوم بلاها..

مريم وهي باديه اتصيح: مادري تعال بسرعه؟

فيصل: خلاص بزقر خالد وبيي..

وماصاروا خمس دقايق الا خالد وفيصل بعد موجودين.. تموا يحاولون بس ماشي فايده.. الكل زاد خوفهم.. قرروا يكسرون الباب..

وفعلا فيصل كسر الباب.. ودخلوا الغرفه شافوها قاعده على زاويه بعييده.. وملتمه حول نفسها.. واتصيح .. اول ماشافها ابوها جيه جرب منها.. وتوه بيمسح على راسها جان اتصارخ عليه فطوم..

فطوم: قووووووووم.. خوز عني.. مابا .. لا اتجرب مني..

استغرب بوخالد من تصرفه .. ومريم وام خالد كانوا ميتين صياح على حاله فطوم اول مره يشوفونها بهالمنظر.. شعرها مب مرتب.. وترتجف.. وتعرق.. ونظرات عيونها كيف غريبه.. الخوف الي تحس فيه يوم ابوها يقرب منها.. وكيف ملتمه حول عمرها ..

مريم قربت منها.. : فطوم.. انا مريم اختج.. حبيبتي.. هدي..

فطوم: لا لا .. انا ما عندي خوات.. ماعندي حد. شو تبون مني..

الكل زاد حزنه وحيرته على حاله فطوم.. على طول خالد طلع واتصل حق دكتور يعرفه عشان يسأله عن حالتها.. والدكتور فهمه ان هاي حاله نفسيه ممكن تمر فيها اي بنت او شاب في عمر المراهقه.. لأنهم في هالعمر ما يتحملون اي صدمه.. او اي تصرف.. ولازم يتعاملون معاها بهدوء عشان تهدأ وترجع لطبيعتها.. وقاله انه راح ايي في الدرب عشان يشوف حالتها..

غانم كان ميت من الخوف عليها.. وكل شوي يطالع عمه وكل نظراته اتهام وعتاب.. : فطوم.. انا غانم .. هدي عمرج..

بدت فطوم اشوي تهدأ يوم كانت تتطالع الصور حوالينها واتشوف عمرها مع اخوانها وخواتها فيهم.. قامت تهدأ شوي.. وتتقبل الي يقربون منها..

فطوم: مريوووووووم.. تعالي..

مريوم من سمعتها تزقرها ركضت صوبها وحضنتها .. وتموا يصيحون..

فطوم: مريوم لا تروحين.. خلج وياي.. احبج فطوم.. لا تزعلين مني.. انا بكلم ابوي..

مريم مب عارفه عن شو ترمس فطوم بس تمت اتسايرها.. : لا حبيبتي ما اقدر ازعل منج.. انتي اختي حبيبتي..

ام خالد جربت من فطوم: فطوم.. حبيبتي.. انا امج..

فطوم من شافت امها لوت عليها وتمت اتصيح.. وحطت راسها على ريلها .. وتمت امها تمسح على راسها.. وفجأة ردت قامت .. وتنادي على غانم..

غانم: لبيه.. انا يمج.. آمري..

فطوم: ابوي بيفرقنا غانم.. الله يخليك لا تودرني..

بوخالد يوم سمع هالكلمه رد جرب منها: لا حبيبتي ما بفرقج عنه.. انتي وغانم لبعض ان شاء الله..

فطوم: انزين وابراهيم.. ومريم..

بوخالد ما كان عارف شو يقول بس شاف ما بيده حيله.. ما بغى ان حالتها اتزيد عن الي هي فيه: هي حبيبتي.. ابراهيم ومريم بعد بياخذون بعض..

فطوم حضنت ابوها وتمت اتصيح: ابوي حبيبي.. انااحبك..

بوخالد: وانا بعد احبج..

خالد : وصل الدكتور..

دخلوا الدكتور وتمت مريم ويا خالد والدكتور عند فطوم.. تم الدكتور يرمس وياها اشوي.. وعطاها حبه مهدأه.. ووصف لها على شويه مهدئات.. عشان تهدأ نفسيتها شوي..

الدكتور: حاولو تبعدونها عن جو الإنفعالات والضرايب.. عشان تهدأ..

خالد: ان شاء الله دكتور..

من طلع الدكتور من عندها الكل رد دخل عندها.. وطبعا فطوم لأنها وااايد اتحب اخوها فيصل فهو قرر يبات عندها وريم راحت غرفه مريم تنام وياها..

فطوم طول الليل وهي ترمس ويا فيصل.. : فيصل.. الله يخليك لا تخليني بروحي..

فيصل: لا انا يمج حبيبتي..

فطوم: فيصل.. مريوم بتروح الجامعه بعدين انا بتم روحي..

فيصل: لا مب روحج.. انا وريم وغانم وخالد وخوله ..كلنا وياج..

فطوم: خلاص احين ابوي وافق على زواج مريم وابراهيم..

فيصل: هي الحمد لله..

وتمت ترمس وياه لين ما نامت.. ونام فيصل عندها..

..

خالد راح عند ابوه عشان يتخبره .. يشوف من صدق وافق.. ولا بس عشان يهديها..

بوخالد: انا مب موافق ولا عمري بوافق من قلبي.. بس شو اسوي.. مابا بنتي تنضر.. فراح اوافق عشانها.. بس مب حاضر عرسهم.. ولا ابا اشوف رقعه ويهم من بعد العرس

خالد: ابوي حرام عليك.. مريم شو ذنبها.ز

بوخالد: ذنبها انها تبا ابراهيم.. وموافقه عليه.. وكلمتي مب ماشيه عليها

خالد: لك كلمتك ابوي.. بس الحق ينقال.. ابراهيم ما ينعاب بشي.. ابوه غلط هو ليش يدفع ثمن غلطته..

بوخالد: انت ما بتفهم احساس ان واحد يجتل ابوي.. بتكرهه وبتكره كل طوايفه.. حرمني من ابوي.. وحرم هنادي وكلثم عماتك.. كانوا صغار محتاجين لأبوهم شرات ما فطوم تعتازني..

خالد: ربي يطول بعمرك ابوي.. بس يدي الله كتب له ان يموت جيه.. وكل ها قضاء وقدر..

بوخالد: لو ما طعنه سلطان.. جان يمكن بيعيش بعد شوي..

خالد: ابوي.. سامحه.. المسامح كريم.. ادعي له بالمغفره..

بوخالد: انا ابا ارقد.. اظهر خالد ..

طلع خالد من الغرفه وهو مب عارف كيف يقنع ابوه.. وراح عند مريم وخبرها عن كلام ابوها بس ما قال لها السبب..

مريم: ابوي ليش جيه كاره ابراهيم بالذات؟؟ شو مسوي له

خالد: مادري.. المهم شو رايج عشان ارد على الريال واقول له القرار

مريم: لا.. كيف تباني اعرس وابوي ما يحضر عرسي .. تراها ليله في العمر ما تنعاد

خالد: يلا عاد انتي لا تعاندين.. مصيره ابوي بيوافق..

ريم: صدقه.. انتوا املجوا ويمكن سبحان الله عمي يغير رايه..

مريم: لا..

خالد: احين انتي الي ممشكله الموضوع.. عشان فطوم..

مريم: دخيلكم لا تضغطون علي.. والله الي فيني يكفيني..

خالد: انتي لا تردين علي اليوم.. فكري هالإسبوع.. واتريا ردج.. يلا تصبحون على خير..

ريم: فكري مريوم.. والله صدقه خالد..

مريم: مادري بفكر..

ريم: ابراهيم يحبج لا تنسين.. ونادر مافي في هالوقت ناس يحبون من قلبهم .. ويسوون المستحيل عشان الي يحبونه

مريم: الله كريم..

 

---